Asif Hacıyev
Azərbaycan Respublikası Təhsil İnstitutu Tədris resurslarının metodologiyası
şöbəsinin müdiri, pedaqogika üzrə fəlsəfə doktoru, dosent
haciyev_asif@mail.ru
Yeniləşmə mərhələsi yaşayan ümumtəhsil məktəblərimizdə müasir pedaqoji baxışlara istinadən hazırlanmış tədris vəsaitlərinə böyük tələbat vardır. Təyinatına, məzmununa və işlənmə formasına görə fərqlənən belə vəsaitlərin hazırlanmasına qabaqcıl müəllimlərimiz xüsusi maraq göstərsələr də, onların işlənilməsi ilə bağlı dəqiq məlumatlara malik olmadıqlarından müəyyən çətinliklər çəkirlər. Bu amil nəzərə alınaraq məqalədə tədris resurslarından bəhs olunmuşdur.
Müasir mərhələdə Azərbaycan təhsilinin qarşısında qoyulan strateji vəzifələrdən biri ümumtəhsil məktəblərində təlim prosesini, onun məzmununu inkişaf etmiş qabaqcıl Avropa ölkələrinin standartlarına uyğunlaşdırmaqdır. Təhsilin demokratik prinsiplər əsasında idarə olunması, peşəkar müəllim hazırlığı və innovativ təlim texnologiyalarının səmərəli tətbiqi kimi mühüm amillər üzərində qurulmuş yeni təhsil konsepsiyası bu uyğunlaşdırma prosesinin nə müddətdə, necə və hansı vasitələrlə reallaşdırılması ilə şərtlənir. Təbii ki, ənənəvi təhsil modeli kimi səciyyələndirilən yaddaş məktəbindən daha mütərəqqi təhsil modelinə, yəni təfəkkür məktəbinə keçid müəyyən zaman çərçivəsində reallaşdırılmalıdır. Burada nə tələskənliyə yol vermək, nə də vaxtı uzatmaq özünü doğrultmaya bilər. Tələskənlik formalizmə, gecikmək isə konsepsiyanın aktuallığını itirməsinə şərait yaradar. Odur ki,